ადგილობრივი თვითმმართველობის არჩევნებში ახმეტის მუნიციპალიტეტის მერობისთვის ორი კანდიდატი იბრძვის: „ქართული ოცნება - დემოკრატიული საქართველოს“ მიერ წარდგენილი ალექსი ფიცხელაური და „ერთიანი ნაციონალური მოძრაობის“ კანდიდატი ზურაბ ოტიაშვილი. არჩევნები 2 ოქტომბერს გაიმართება.

აგვისტოში კახეთში კორონავირუსის 10 000-ზე მეტი შემთხვევა აღირიცხა. დაავადებათა კონტროლის ეროვნული ცენტრის კახეთის განყოფილების უფროსის, ნელი ხიზანიშვილის თქმით, მეოთხე ტალღის აღმავალ ეტაპზე, დღიური ინფიცირება ჯერ 200, შემდეგ კი 400-500 შემთხვევაზე ავიდა, რაც რეგიონისთვის რეკორდული მაჩვენებელი იყო. ბოლო კვირების განმავლობაში, ეპიდვითარების სტაბილიზაციის ნიშნები ჩანს.

„მე, როგორც სკოლის ხელმძღვანელი, მაგალითის მიმცემი უნდა ვიყო თუნდაც ჩემი პედაგოგებისთვის“, – ამბობს დუისის საჯარო სკოლის დირექტორი ლილი სვიაკაური, რომელიც 12 აგვისტოს კორონავირუსზე აიცრა. ის ამ სკოლაში პირველი იყო, ვინც ვაქცინაცია ჩაიტარა. მას შემდეგ კიდევ 6 პედაგოგი აიცრა. ლილი სვიაკაური იმედოვნებს, რომ ახალი სასწავლო წლის დასაწყისისთვის სკოლის თანამშრომელთა დიდი ნაწილი ვაქცინირებული იქნება.

61 წლის ასაკში ემიგრაციაში, კერძოდ, საფრანგეთში, გარდაიცვალა თბილისის სახელმწიფო უნივერსიტეტის კავკასიოლოგიის ლაბორატორიის დამაარსებელი, ზვიად გამსახურდიასა და ჯოხარ დუდაევის თანამებრძოლი, დამოუკიდებელი ჩეჩნეთის პირველი პარლამენტის დეპუტატი, მათე ციხესაშვილი.