სააგენტო „ბალტნიუსის“ ინფორმაციით, მაისურაძე ინტერპოლით ძებნილთა სიაშია. მისი ძებნის მოთხოვნა რუსეთის მხარემ გასცა. რუსეთს ეჭვი აქვს, რომ ზურაბ მაისურაძეს შესაძლოა კავშირი ჰქონდეს საერთაშორისო ტერორისტებთან.

სასამართლოს გადაწყვეტილებით, ზურაბ მაისურაძე 10 დღით იქნება დაკავებული. ამ დროის განმავლობაში რუსეთმა ლიტვურ მხარეს მისი ექსტრადიციისთვის დოკუმენტები უნდა წარუდგინოს.

ლიტვაში საქართველოს საელჩო მომხდარის შესახებ კომენტარს არ აკეთებს.

ზურაბ მაისურაძის სახელი ლაფანყურის სპეცოპერაციას უკავშირდება, რომელიც 2012 წლის 28 აგვისტოს ჩატარდა. სპეცოპერაციის შედეგად შეიარაღებული ჯგუფის 7 წევრის ლიკვიდაცია განხორციელდა, მათ შორის საქართველოს მოქალაქე ეთნიკური ქისტების. დაიღუპა ასევე სპეცრაზმის 2 წევრი და თავდაცვის სამინისტროს სპეციალური ოპერაციების ძალების ექიმი.

სახალხო დამცველი საპარლამენტო ანგარიშში აცხადებს, რომ საქართველოში ჩეჩენი მებრძოლების ჩამოყვანის ორგანიზებას საქართველოს შინაგან საქმეთა სამინისტროს მაღალჩინოსნები, მინისტრის მოადგილე გია ლორთქიფანიძე, ანტიტერორისტული ცენტრის უფროსი ზურაბ მაისურაძე და ამავე ცენტრის კახეთის სამმართველოს უფროსი სანდრო ამირიძე ხელმძღვანელობდნენ. სახალხო დამცველის განცხადებით, საქართველოში ჩამოყვანილ ჩეჩნებს აძლევდნენ იარაღს, წვრთნიდნენ და პირდებოდნენ „კორიდორის“ მიცემას რუსეთის ტერიტორიაზე გადასასვლელად.

ლაფანყურის საქმე ამ დრომდე არ არის გამოძიებული.